الاثنين، ٢٩ ديسمبر ٢٠٠٨

خلاصة تجربه إنسانيه

أسوأ وأدنأ وسيلة ابتزاز هى: لوى البوز!
والبوز اللى انا بتكلم عليه المره دى هو البوز الرجالى!
طبعاً أنا لا استثنى البنات من الموضوع ده وبالذات إننا خبرا وبندعم البوز أحيانا بالدموع كمان لو البوز لوحد ماجبش نتيجه
والتنهدات
وساعات بالصراخ
وآخر مايفيض بينا ولوده مانفعش بنأجر محامى يتولى عنا المهمه

لكن موضوعى النهارده البوز الرجالى
يبقى الواحد من دول مش عامل اللى عليه واللى هو نفسه وعد بيه وخد راحته أوى وانجلى وهو بيحكى عن إنجازاته اللى لسه ماشفنالهاش أماره
وتانى يوم بوووووووووزززز متين! ولا بوز الجزمه!
وانتِ تفضلى تتنتطى حواليه زى البهلوان ..
- طب اقولك نكته؟
-بوز
-طب اجيبلك ساندوتش!
-نفس البوز
- طب عايز فلوس؟
مايردش!
طب أنا زعلتك فى حاجه؟ طب أهلى صدر منهم حاجه لا سمح الله؟
طيب إنت حاسس إن طلباتنا مغالى فيها؟
طب أنا خلاص مش عايزه حاجه!
وهنا قد تنفرج الأسارير و قد لا تنفرج فى انتظار المزيد من التنتيط من حضرتك!
على حسب ... يعنى لو هو معودك على كده وانتِ متعوووده داااايماًًًً، إنك تتنازلى يبقى هيتعامل معاكِ بطريقة بيبسى وهيطلب أكتر لإن أكيد فى أكتر
ولو إنتِ جديده فى الكار يبقى هينبهر بأدائك ويعبرك ويرد عليكى عشان يشجعك ومش هيكسفك لإن دى أول مره وهو بيربى زبون ... زبون كروديا طبعاً
وفى نفس الوقت ممكن مايدلقش ويوافق ويفضل ضارب نفس البوز
من ناحيه يحفظ كرامته ومن ناحيه عشان إنت تتلحلحى وتقنعى أهلك إن مش مهم سبع البرمبه يجيب البرمبه اللى طلبتوها منه
وبكده يكون ضرب عصفورين بحجر
المصيبه بعد كل ده، إنك تلاحظى من تصارفاته إنه مقتنع إنه لقطه! وإنك أنت وأهلك بتعملوا كده عشان مايطرش من إيديكم!!!
ويا ويلك لو شكرتى فى أهلِك ووقفتهم جنبكم، هيكون رد فعله بوز معتبر وإنذارات إنك تبطلى تلميح إنه ماعملش إللى عليه وإن أهلك نجدوكم
يعنى مطلوب منك إنت وأهلك تضحوا من سكات وتبوسوا إيديكم وش وضهر لإنه اتنازل واتعطف وقبل تضحيتكم! ومن سكات يا كلاب!
مش هتفوقى من كل ده غير لما تسألى نفسك سؤال واحد!
على إيه؟
إدينى أماره للماضه اللى انت فيها دى؟
ولو مالقيتيش الإيه دى
ولو لقيتى إن أنتِ وأهلك برضه (معلش زودتها بس أرجو ان يتسع لى صدر المحكمه) لو لقيتى إن إنتم اللى عملتم كل حاجه بدل المحروس ومع ذلك مطلوب منكم تستحملوه
يبقى اعملوا فى نفسكم معروف وماتستحملوهوش
الرجل لازم يكون هو الطرف اللى بيدى بما إن هو اللى ليه القوامه وهو اللى هيأويكِ ويأنيكِ (بالبلدى) ويطلع البلا عليكِ (باللاوندى)

هل تأملتم يوما قصة الخلق؟
آدم بعدما تعلم الأسماء كلها وعرف ربنا وعرف مكانه فى الجنه والمهمه اللى هو موكل بها على الأرض ... اى بعدما تعلم وتثقف وتدين وكون نفسه،
طلب حوا
طلبها بكل أدب
ليييييه؟
عشان تأنس وحدته ... بسسسس!
وربنا إداهالوا كمكافأه ...
يعنى لازم يصونها ويحافظ عليها ... وهى عارفه دورها كويس دى مخلوقه له وبناءاً على طلبه
لكن كان ينفع بعد ما طلبها عشان تأنسه بس يقولها هاتى انت البرمبه بقى يا حلوه؟
ولا حاسبى إنت بقى أصلى نسيت محفظتى؟
ولا أنا مش عامل فرح! عشان الخطوبه العره اللى ع الضيق اللى انتِ عملتوها؟
ماعتقدش ...
ولا يكون عشان ربنا عارف إنه هيعمل كده، نزلنا على الأرض عشان دى مش عمايل ناس تستاهل تعيش فى الجنه؟
تصدقوا ممكن؟
خلاصة التجربه:
إوعى تستسلمى لابتزاز البوز!
آدم خلق ليعمل ويحقق وينجز واحنا ربنا خلقنا نآنس ونشرف وبسسسسسس!
أى حاجه تانيه هتقدميها تكون option أو offer ولفتره محدوده
وبعد مايجيب كل البرمبات اللى قال عليها
لأن أصلا ده مش هيسعده (إنك تكونى أنت من يوفر الأشياء الضروريه للحياة)
ولأن ده مش هيحسسه بكيانه وبرجولته وهيتعود على الفشل والإخفاق فمش هيحاول أصلا وتعيشى إنت فريسه لكل العقد دى!
فهمتى؟

هناك ٦ تعليقات:

Che يقول...

بصى يا ستى , انا مقتنع ان اسوأ حاجه فى الدنيا هى الابتزاز سواء بلوى البوز او من غيره .. انما كل شئ فى الدنيا احتمالات .. يعنى ممكن يكون لاوى بوزه عشان فعلا شايف ان الموضوع يستاهل ( بغض النظر عن رايك لانه برضه انسان و ليه راى - و لو فى شئ اسوأ من الابتزاز فهى الديكتاتوريه و فرض الراى ) و جايز انه يكون غلطان و جايز يكون مضايق - و انا هنا مش بدافع عن الرجاله بس باقول كل الاحتمالات ... اما عن حكايه اهلى عملو و اهلى سوو و اهلى ضحو كتير على شانى و استحملو و انك اللى مش عامل اللى عليك ( انتى مش حاسه ان الكلام ده قريب من المعايره - برضه بغض النظر عن انك تقصدى كده او لا انما الديموقراطيه انك تحطى نفسك مطرح الطرف الاخر و ماتقبليش عليه اللى انتى ماتقبليهوش على نفسك - و قبل ما تقولى انه عادى افتكرى كام مرة كنت فرحانه لما كان بيتكلم عن اهله و امه بالذات قدامك ) .. عارف ان فى ناس بتقول ما انا لازم اقوله بس الفرق فى الاسلوب - يعنى انا ممكن اسئل واحد 2+2 بكام يقولى 5 انا ممكن اقوله لا غلط و الصح انهم 4 مش 5 و ممكن اقوله انت حمار و مابتفهمش و اديله بالجذمه كمان ( بما اننا فى موسم الجزم اللى افتتحه الاخ منتظر ) .. و بعد كل الكلام ده و اللى انتى بتعملوه ترجعوا تسالوا الواحد مش بيحب اهل مراته ليه و خصوصا حماته - يعنى هما بيجبو عليا و بيساعدونى و مستحملنى و مسحملين قرف اللى خلفونى و برضه مش عاجبنى - الصدقه بيتنقص من اجرها لو الواحد اعلن عنها - اعتبرى الموضوع ده صدقه و ماتتكلميش عنه ( و ليكى و لاهلك الاجر و الثواب عند الله ) و لو بعد ده كله شايفه انه برضه هو اللى غلطان و انك مش قصدك كده و انه تنبل يبقى انا اسف انى اقولك انه مش غلطه لوحده انما غلطك و غلط اهلك كمان معاكى عشان اخترتيه و هما وافقو عليه و اللى بيعمل غلط لازم يتحمل نتيجته مش يدور يعيط و يشكى لكل الناس و بعدين ايه اللى جابرك على كده ( قال ايه اللى رماك على المر ) فا يا اما تستحمل المر او اللى امر منه على راحتك
و فى الاخر انا مش هجومى بس الرد كان لازم يكون من جنس الموضوع

Unknown يقول...

maeway 3n booz el setat, ya3ni booz el regala dah a7rto ams :)
la yewadi wala ygeeb el youmeen dol

enjoyed the read
will read more :)

البت anonymous يقول...

متشكره جدا يا Che على ردك واهتمامك بمناقشة الموضوع
ولو إنى حاسه بكثير من الحده فى كلامك .
أنا باقدم نصيحة هى "خلاصة تجربه إنسانيه" واللى يقدملك نصيحة، قوله متشكر حتى لو مش هاتعمل بيها
لكن ماينفعش ماتصدقوش! لأنه عاش التجربه واتكوى بنارها وبيقدملنا خلاصتها على طبق من فضه!
وأنا من البدايه قلت ونوهت عن بوز البنات وقلت إنه ساعات بيوصل للمحاكم يعنى أنا مش متحيزه بس دى تجربتى .. يمكن أنت مريت بالعكس ..
الوجه الآخر للعمله لا يلغى وجود الأول.
أما عن الأهل فدول شكرهم واجب فى كل وقت لكن لما بيكون فى طرف بيحسس على بطحته فدى بتنأح عليه لوحده! مش مطالبه أنا بقى أتألم معاه! صح؟
إنت ناقشت الاحتمالات الأخرى بشكل رائع بس أنا باتكلم عن احتمال واحد إن يكون البوز بغرض الابتزاز لأن ده بيكون شئ دنئ جداً
وعموما أدينا أنا وأنت وصلنا لنفس النتيجه وهى أنا إيه إللى يجبرنى على كده؟
شفت بقى إن رأينا وجهين لعمله واحده؟
بس أنا رجعت العمله دى البنك عشان طلعت برّانى!:)
ورفضت اكون زى ما أنت بتقول "قال إيه إلى رماك ع المر. قلت اللى أمر منه" لا أنا أرمى الاتنين وانا الكسبانه
وبرضه أشكرك
أنا مستنيه رأيك فى حالة إذا كنت مصدق الحاله... يعنى لوإحنا شلة أصحاب وجت صديقه تشتكيلناالحالة دى(واحنا واثقين فيها) هاتكون نصيحتك زيي؟
أنا مستنيه ومستنيه كمان تقولى رأيك فى التناول

البت anonymous يقول...

Jerkulez:
nice name :) welcome to my blog
booz el setat is famous enough we etthara tarya2a
ana batkalem 3an ekteshaf gedeed basagelo be2esmy :)
walaw eny till now el bet anonymous :)
thanks again

حروف يقول...

بوست جميل ولوي البوز وحش في كل الاحوال اول زيارة

البت anonymous يقول...

أهلا وسهلا بك يا حروف وبعد الشر عليك من الجرح