المشاركات
أنا ماحدش قاللى إن الدنيا هاتبقى صعبه كده!
دى صعبه قوى
بالذات عليك وانت لوحدك! وأصعب لو معاك حد .. مش معاك أصلاً
أنا عملت كل اللى قالوا لى عليه!
وكل ما اعمل كل ماتتعقد وتصعب زياده
وانا مش باصعب عليها بنت الـ ... دى (مشيها space المره دى :) )
بجد ليه كده؟ طب إنتوا حد قالكو عليها وطلعت زى ما قال؟
متهألى ماينفعش أصلاً!
لازم أهالك قالوا لك زيى:
ذاكر تنجح .. غش تجيب مجموع!!! لأ لأ مش دى مش دى ... الأخيره دى أصحابى اللى قالوها لى!
أنا دايما كده بادلق على طول!
إنما الأهل .. يا سيدى...
كانوا دايما تُقال وراسيين وينصحوا كأنهم ناس مجربه وواعيه!
واحنا؟ إحنا نصم إللى يقولوه
بالذات لو إنت الإبن البكر تلاقيك عامل زى ورق الكربون بيطبع عليك كل التعليمات
ما بالك بأه لو البنت البكر؟؟؟؟ دى بتبقى بالظبط زى ورق الزبده .. يمتص الزيوت من تحت الأكل ويتعك فيها برغم من إنه لا هو اللى اتقلى ولا هو اللى هيتاكل!
يعنى لا هى جربت بنفسها نار التجربه اللى اتحفرت فيها من كتر ما حفظوهالها ولا هى هتجرب طعمها إذا كان فيه بعض المتعه الوقتية حتى!
- طب وانا مالى؟
- بنننننننننت
- أععععععععععععععع
وتلاقينا كلنا ماشيين فى الدنيا حافظين كل حاجه ومش فاهمين ولا حاجه
يعنى من فينا مش حافظ:
خليك محترم عشان الناس تحترمك!
اضحك تضحك لك الدنيا
ذاكر بس انت وانجح وكل حاجه تتدبر
لما هاتشتغل وتكسب قرشك هاتحس بمتعة الحياة!
لما تبقى فى مركز مرموق ألف واحد(ه) هايتمناك(ى)
لما تبقى فى بيتك إبقى اتأمر
وادينا ذاكرنا وانجحنا واحترمنا اللى يسوى والى مايسواش واشتغلنا واتمرمقنا (قصدى اتمرمطنا طبعا) وبقينا فى بيوتنا
لا حد بيحترمنا (كل يوم أقل واحد فى الشارع يطلع عليك القديم والجديد)
ولا ضحكتلنا الدنيا، ولا حاجه اتدبرت، ولا واحد ولا ميه ولا ألف وتلتماية حوالينا فضلوا للآخر (الظاهر بيتمنوا من منازلهم .. أو على طريقة محمد صبحى .. "أصلى باتمنى فى الجزمه الأوووووووول)
ويبقى حد بقى يتأمر فى بيته ويسمعنى حسه!
ولا يسمعنى ليه؟ أنا باعرف أقرا كويس! هابقى أجيب الجرنال واستقرا بنفسى!
وامووووت واعرف إيه هى متعة الحياه دى!
متعة إيه وكل اللى حوالينا مصرين يغالطوا كل شئ وكأننا إحنا بس إللى اتربينا!
ولما تحاول تخرج الناس دول من حيز حياتك وتحطهم على الهامش فى مكانهم الطبيعى
تلاقيك خرّجت كل الناس لدرجة إن الهامش كبر قوى وأخذ حيز الصفحه بالكامل! وانت يا ولداه بتدور على مكان فى الهامش ولا ديل الصفحه إنشالله حتى إيجار جديد!
يمكن أنا سوداويه؟
طب حد فيكو كده يجرب يسأل إللى جنبه: إنت مبسوط؟
بس أوعى زوج ولا زوجه يسألوا السؤال ده لبعض!
هتبص تلاقيها بصتلك أو بصلك كأنك ضربته بالقلم!
لو سؤال أنت مبسوط خرج من فم زوج أو زوجه لبعض اللى بيتسمع حاجه تانيه خالص!
"إنت مبسوط معايه ولا بتمثل!"
وطبعا الطرف المتهم هيكيل للمدعى الاتهامات لأن الهجوم خير وسيله للدفاع
وأنا كل القصص اللى فى حياتى، ابتدت وانا باقول لحد:
مالك؟ ليه مش مبسوط؟
طب والله! مش مصدقين؟
أول مره قلتها لواحد واحنا صغيرين قاللى هاقولك على سر وأوعى تقوليه لأى حد! وحلفنى .. وراح بايسنى! باسنى قبل ماعرف يعنى إيه ده أصلاً ..
وفضلت طول فترة الطفوله حاسه بالذنب والقهر وانا مش قادره أقول لحد! ما هو سر!
قلتها لصاحب الشركة عشان أفهم إيه بيدور حواليا، الشريك الثانى افتكرنى بتآمر عليه وزمايلى افتكرونى باشتكى منهم وطلع الرجل اللى مضايقه أنا شخصياً!
قلتها لزوج واحده معرفه لقيته عايز (يقعد) معايا!
مره واحده واحد سألهالى وحكيتله .. وحبيته .. بس لا كان ينفعنى ولا أنا كنت ناويه أنفعه .. فساعدته بكل قوتى.. يبعد عنى :)
ومن ساعتها مبقاش حد يقولى: مالك؟
فنسيت .. نسيت وعملتها تانى..
لسه النهارده قايلاها لزميلى فوجئت إنه مش عايز يحكى لأن أنا السبب!
مراته بتغير منى! ليه؟ أصلى قلت لها إنك فسخت خطوبتك!
طب وده إيه دخله بيها؟
قاللى زميلى أنا ماعرفش ..ومش عايز أعرف .. وأنت مش مسؤوله .. دى هى .. أما لو سألتينى عن مشاعرى أنا...
قلت له بس أنا ما سألتش ومش هاسأل وعلى قولك مش عايزه أعرف ...
الاشتراك في:
تعليقات الرسالة (Atom)
هناك تعليقان (٢):
بأه " ماحدش قالك ان الدنيا صعبه كده ! " الحقيقه ان الدنيا اصعب من كده بكتير
عارفه الاجانب عندهم تعبير بيقول "life is a ..... " ( انا طبعا حفاظا على الاداب العامه ماكتبتش بيقولو عليها ايه انما اكيد اى حد بيتفرج على افلام اجانب او ليه احتكاك معاهم هيعرف قصدى - شوف يا اخى حتى لما باكتب كلام مؤدب بحس فيه تلميحات مش مؤدبه نع انى والله مش قاصدها " الاداب " , " احتكاك " ) ماعلينا
كل اللى انتى بتقوليه على الاهل و طريقه التربيه كلام اتكرر معانا كلنا بدرجات متفاوته - طبعا كل الاباء كانو الاول ( تقريبا ماكنش فيه توانى على ايامهم ) , و كل الاباء كانو مجتهدين و مجدين فى شغلهم و حياتهم ( مع ان ده المفروض ينعكس علينا بصفتنا الابناء و اديكو كلكو شايفين عيشتنا عامله ازاى - اللهم لا اعتراض
بالنسبه لموضوع الابن الكبير البكر ده انا مجربه - المفروض انى اول فرحه اهلى و انهم دايما فرحانين بيا قدام الناس .. انما فى البيت و مع اى غلطه او تصرف مش صح ( من وجهة نظرهم طبعا ) ابقى مجرد " خيبه الامل اللى راكبه حمار لانى مارتقتشى انى اركب جمل
فى موضوع لعمر طاهر عن اشهر 100 جمله الاهل بيقولوها لاولادهم هتلاقى فيه كل الجمل اللى انتى كاتبها و اللى مش كاتباها و اللى ماتعرفهاش كمان
اما موضوع النب البكر فانا باعترف انى ماعرفوش انما بناء على نظره مجتمعنا للبنت ( و انا واحد من المجتمع ده " و انا لا ابرئ نفسى ة لكن النفس اماره بالسوء " ) اكيد هتكون قد القرف اللى انا شفته بس مضروب فى 100 و يمكن فى 1000 او اكتر ( طبعا كلمه القرف دى ليها دلاله وقتيه على الوقت اللى انا كنت باشوف و باستحمل المعاملات دى لغايه ماعرفت انها اسمها تربيه - مع اختلافى او اتفاقى مع اسلوب التربيه نفسه - انما لازم ننسب الفضل لاصحابه برضه )
قعدت اضحك كتير على موضوع ابن خالتك ده لانى حاسس نك غدرتى بيه بعد ماديتله الامان ( سيبك من انك سيحتيله دلوقتى و يارب لو متجوز مايقراش البوست دى ) و برضه موضوع جوز صاحبتك - لان ده الطبيعى اننا كرجاله نفكر بغرايزنا ( و طبعا عندنا غريزة بتطغى على اى غريزه تانيه ) و قبل ماحد يتشنج احب اقول على دراسه علميه فى جامعه برنستون ( الجامعه اللى كان اينشتين بيدرس فيها ) بتقول ان الراجل سدس حياته بيقضيها فى التفكير عن الجنس فى حين ان الست نسبتها اقل بكتير ( بس كده الدراسه خلصت ولا تعليق )
اما موضوع زميلك فى الشغل و مراته ده طبيعى جدا .. لان كل واحد ( و هنا الراجل زى الست من ناحيه التفكير ) بيفكر فى شريك حياته على انه ملكيه خاصه - و كلنا هنا بنتصرف بالغريزة زى الحيوانات من اننا بنحدد مناطق نفوذنا و ملكياتنا و بنحميها
و بجد جميل انك خلاص بقيتى مش عايزة تعرفى و عشان كده عايز اقولك
اهلا بيكى عضوة صالحه فى حزب اللى مش عايزين يعرفو
ياناس اتركوها ل الله نحن البشر مكتوب علينا هكذا بس يجب نقاوم ومانسمح للياس بحياتنا باي طريقة حاولوا تشغلوا نفسكم وشيلوا الافكار من بالكم وحبوا بعضكم بعضا واطلبوا من الله ينور حياتكم
إرسال تعليق